أنتهيت من مسلسل جزيرة غمام ومعرفش إزاي كنت مأجل الجمال ده كله لحد دلوقت! انا فضلت ٣ ايام لحد ما خلصته، من وقت كبير مااتعملش مسلسل كده ولا بالحوار ده.
- ازاي مكنتش شوفته كل ده!
- ايه الجمال ده!
- ايه الزهد والروحانية دي!
- ايه القصة والحوار ده!
مسلسل جزيرة غمام بتدور احداثه في حقبة زمانية معينة تحديداً في عهد الخديوي عباس سنة ١٩١٤ ميلادي، يعني قبل قرن وزيادة، مشهد الإفتتاحية بيشرح كل حاجة.. إرتقاء روح الشيخ العارف لبارئها ويورث ولاده التلاتة بالتقسيم بينهم.
( المحبة – المشيخة – المادة)
عرفات بياخذ المحبة،
ومحارب المشيخة،
ويسري المادة..
– الحوار وجمال قلم عبد الرحيم كمال، النص مكتوب بطريقة جديدة ع الدراما، الطريقة الغير مباشرة في كلامهم، الحبكة الدرامية اللي قايمة على مبدأ التدافع والصراع.. صياغته للمعاني.. عبادة الهوى وحب المادة والإنتهازية، الصراع النفسي اللي جوا كل واحد، صراع الخير والشر.. صراع عرفات وخلدون.
– كل الممثليين بلا استثنا أبدعوا في دورهم حقيقي.. ودي حاجة تُحسبلهم وتُحسب للمخرج حسين المنباوي.
– المسلسل حالة غير طبيعية، حالة من الزهد والتصوف مجسدها أحمد أمين اللي بيثبت كل مرة وكل اختبار إنه هيبقى ممثل تقيل.. أنا فاكر آخر مرة أتجسدت شخصية الزاهد او الدرويش وأتأثرت بيها كان في مسلسل “شيخ العرب همام” اللي كان عامل دور أخوه “سلّام”.
– مصير أهل الجزيرة في مواجهة الزوبعة، الزوبعة اللي هتبلع كل شئ، الجوع، الجشع، السلطة، والفساد.. زوبعة حذرهم منها عرفات ومهد لحدوثها من البداية.
– طريقة سرد عرفات لكل حاجة بتحصل، والدور اللي مكتوبله يخليك تحس إنك محتاج لحد زيه في حياتك، يعلمك زهد الدنيا وحبك لنفسك وللناس بدون شروط، انت أهم حد وأغلى حد هنا. انت صاحب الارض وخليفته فيها.
– على قد ما زعلان إني مشفتوش من بدري بس مبسوط من الحالة اللي طالع بيها من مسلسل جزيرة غمام دلوقتي، من الحاجات اللي هتشوفها وهتسيب فيك أثر لفترة من قوة معانيه ورسايله.
وزي ما الحوار والأداء يخطفوا قلبك، الموسيقى التصويرية فوق الوصف.. والديكورات والتصوير بيقوموا بنفس الدور. جزيرة غمام حالة صعب تخرج منها عقب انتهائها.
