على مدار اربع سنين كان المداح علامه فارقة في المواسم الي اتعرض فيها بل وانه في اول موسم له كان مفاجأه رهيبة للجمهور الي مكنتش متوقع ده ومن بعدها بقى “حماده هلال” و”صابر المداح” جزء مؤثر من كل رمضان معانا ..
قصة مسلسل المداح :
– بتدور احداث المسلسل عن شخصية الشيخ “صابر” الي حرق كتب السحر ومنها كتب وتعاويذ خاصة بالجن ودة بيخليه يقع في صراع مع قبيلة “الجن” الي بتحاول تدم حياته على مدرا الاحداث في صراع تاريخي ما بين الانسان والشيطان.
– المسلسل جذاب لانه تناول عنصر الرعب بشكل جديد ومختلف بطلنا هنا مش بيحارب حد عادي ولا هو اصلاً شخص عادي وده الشئ الاستثناء في سلسلة المداح الي معتقدش في سلسلة مسلسلات حديثة عرفت انها تحافظ على نجاحها وعلى مسار احداثها بشكل قوي زي المداح.
– معظم المسلسلات الي اتعملها كذا جزء مبني على نجاح الجزء الاول محققتش نفس النجاح السابق ليها بل وان الكثير منها فشل فشل ذريع وده كان له تأثير سلبي على البطل وكذلك المسلسل الاصلي.
الكلام دة محصلش مع مسلسل “المداح” فبرغم انه الجزء الاول حقق نجاح متأخر لان مكنش حد متوقع انه يطلع مسلسل قوي بالشكل ده إلا انه مشهد النهاية في المسلسل وقوتة واداء حمادة هلال كانوا العنصر الابرز وحديث منصات التواصل الاجتماعي في موسم رمضان 2021 والي خلى المسلسل بعد كده بقى مسلسل منتظر كل موسم.
– احداث الجزء الرابع بعتبرها الاحداث الافضل ضمن اجزاء المسلسل الاربعة وده لان الجزء ده بالاخص مكنش في مط تقريباً او ملل في الاحداث بالعكس كل يوم حاجه جديدة وشخصية جديدة بتستمر لحلقتين تلاته ودي كانت فكرة حلوه لانها فضلت محافظة على عنصر المغامرة والتشويق لنهاية المواجهة كل يوم بين كل شخصية والتانية.
اداء قوي من طاقم تمثيل مختلف احداث مثيرة و قوية وفيها تفاصيل حلوه.
“حماده هلال” ممثل عنده قبول على كل المستويات وشخصية “صابر المداح” اضافت كتير لرصيده الفني لانه قدمها بشكل قريب من الناس ومش هكون بأفور لو قولت انها من افضل الشخصيات الي اتقدمت في الدراما المصرية كمان انا بعتبره من انجح المطربين الي دخلوا مجال التمثيل بيمثل ببساطة شديدة دون افوره بتكون قريبة من الشخصيات الطبيعية الي بنقابلها في حياتنا.
“فتحي عبد الوهاب” جوكر تمثيل بلا خلاف محدش يقدر ينكر قدرته على لبس اي شخصية بيقدمها حتى انه نجح في تقديم شخصية الشيطان كأنه تعايش معاه في وقت ما !
ضيوف الشرف عاملين شغل حلو وعوامل جذب طبعاً للموسم الرابع خصوصاً ان كل واحد فيهم عامل شخصية مختلفة وعاملها ستايل خاص بيها سواء المتميز “دياب” الي ظهوره كان حديث منصات التواصل الاجتماعية او المخضرم “حمزه العيلي” الي كان ظهوره الأكثر رعباً والموهوبة “سهر الصايغ” في شخصيتها الي قدمتها في الجزء الثاني “مليكة” وأخيرا المُبدع “احمد خالد صالح” في شخصية “النمرود” والي كان مفاجأة الجزء ده من المسلسل.
حمادة هلال – الفنان الشامل الذي وجد طريق النجاح في كافة خطواته
-المسلسل تفوق في تنفيذ فكرة جديدة على الدراما مش بس لأنها صراع بين الانسان والشيطان لان الفكرة دي اتطبقت بأشكال مختلفة وفي اعمال مختلفة افضلها مسلسل “ونوس” ولكن هنا احنا في صراع صريح وواضح ما بين انسان عنده هبه خاصة وقدرات خاصة وشياطين بكل انواعهم واصنافهم وقدراتهم على الايذاء النفسي والجسدي للإنسان.
في وجهة نظري “المداح” حقق المعادلة الصعبة ما بين كاست مميز و احداث مثيرة و وتقديم فكرة جديدة وكمان نجاح مثمر لاربع مواسم متتالية.
