– في بداية مراجعتي للمسلسل حابب اشيد جداً بالمجهود الجبار الي اتعمل في المسلسل ده على كل المستويات وحبيت ابدء المراجعة بالإشادة دي لأنها مستحقة انا مبسوط اني شفت عمل مصري بالشكل الاحترافي الي ميقلش ابداً عن اي عمل عربي اتعمل قبل كده.
قصة مسلسل الحشاشين :
– مسلسل الحشاشين من المسلسلات التاريخية الي بتحكي عن جماعة الحشاشين الي كانوا مشهورين باغتيال الرؤساء والملوك في فتره الحكم الفاطمي والعباسي.
– مبدئياً حابب أوضح ان المسلسل مش مرجع تاريخي للي حصل لكنه مقتبس بعض الاحداث والشخصيات ووضعها في قالب درامي تاريخي فلو هتتفرج على أساس انك تستمتع فده الهدف من المسلسل انما لو حابب تتعرف على التاريخ الحقيقي للجماعة ومؤسسها حسن الصباح فتقدر تقرأ عنه في الانترنت او الكتب التاريخية.
– احداث مسلسل “الحشاشين” بدأت بالحاضر ثم رجعت بالزمن عشان توضحلك حصل ايه وبعدها استكملت احداث الحاضر في قالب زمني رائع ديكورات وملابس وأماكن وكادرات تصوير محصلتش قبل كده او مقبلتهاش في عمل مصري سابق وده شيء يحسب لصناع المسلسل ويشفعلهم مشاكل اللغة الي كانت عامله قلق على منصات التواصل الاجتماعي ما بين لغة عامية ولغة عربية.
– من وجهة نظري العمل لو كان اتعرض باللغة العربية الفصحى كان هيكون افضل كتير وده لأنها فالأول والأخر اللغة الام وكمان هي لغة الزمن والوقت ده ،وده كان هيخلي في شكل لطيف ومنطقي للحوار ما بين الشخصيات دون استخدام ألفاظ عامية تفصلك من أجواء المسلسل في أوقات كتير.
– كنت متخوف جدا من كتابة “عبد الرحيم كمال” للعمل وده لأني قابلت ملل كتير في مسلسلاته السابقة وبالأخص “القاهرة كابول” ولكن على العكس الكتابة كانت قوية وعجبتني ولكن كان في بعض الاحداث المضافة دراميا للقصة معجبتنيش وحسيتها ملهاش داعي او مبرر درامي وسط الاحداث.
– أداء الممثلين جيد باستثناء بعض الاختيارات الي مش عارف الحقيقة سبب اختيارها خصوصا انها مواهب شابه لم تنضج نضج فني كبير لدرجة انها تأخذ مساحة لشخصية تاريخية مؤثره.
كريم عبد العزيز موهبة تستحق التقدير وعنده من القبول عند الجمهور الي يخليه دايماً في الصف الأول وبرغم ان دي تقريباً اول مره كريم يقدم دور شرير لكنه نجح في تقديمها خصوصاً في النصف الثاني من المسلسل وان كان الموضوع فيه انقسام بين الجمهور انه في ممثلين تانين كان ممكن يقدموا الدور بشكل اقوى وينجح اكتر ولكن ده مينكرش ان كاريزما كريم عبد العزيز اضافت كتير للشخصية وحققت النجاح المطلوب خصوصاً في المشاهد المؤثرة والأخيرة في المسلسل الي كريم ابدع في تقديمها كممثل مخضرم اتعلم كتير من كبار الفن زي الزعيم “عادل امام” وزي “نور الشريف” و”محمود عبد العزيز”.
معلومات قد لا تعرفها عن كريم عبد العزيز .. “ابو علي”
فتحي عبد الوهاب .. نجم مخضرم لا مثيل له قادر على التوغل في أي شخصية بيقدمها وعرضها بأفضل شكل ممكن والجدير بالذكر انه في نفس الموسم قدم شخصية “قزع” في مسلسل “المداح” واتقن دور الشيطان بشكل مرعب.
احمد عيد .. كوميدي ودرامي فائق النجاح .. مش سهل ابدا قرار انك تتحول من اقصى الكوميديا لأقصى الدراما بشخصيات شريرة في موسمين متتالين وتحقق نجاح غير مسبق والجمهور يشيد بيك بالشكل ده الا لو انت فعلا موهبة جبارة تستحق التقدير والثناء وإعطاء فرص اكثر لاستغلال الموهبة دي.
سامي شيخ و احمد عبد الوهاب من مكاسب الموسم الرمضاني وموهبتين يستحقوا الثناء وبشده وادوارهم في المسلسل اكثر من رائعة وأتمنى نشوفهم في اعمال جاية كتير .
– بشكل عام المسلسل تجربة قوية وصعبه وخطوة مش سهلة هينقسم الآراء عليها ما بين مؤيد للعمل ونجاحه وما بين معارض للعمل ونجاحه ولكن محدش يقدر ينكر تأثيره كعمل يثير التساؤل ويخلي الصغير والكبير يروح يعمل بحث عن الشخصيات وتاريخها وده شئ يحسب للصناع والفكرة وأتمنى انها متكونش التجربة الأخيرة لان عندنا حكايات وحقائق كتير في التاريخ محتاجه تظهر في اعمال درامية كتير.
