مراجعات

فيلم zootopia .. الفيلم الذي لا يجب ان يفوّته كبير او صغير

فيلم zootopia

نبذة عن فيلم zootopia

  • فيلم Zootopia زوتوبيا او زوتروبوليس 
  • فيلم تصنيفه انيميشن / مغامرة / غموض
  • حاصل علي أوسكار 2017 لاحسن فيلم رسوم متحركة

قصة فيلم zootopia

عن مدينة زوتوبيا اللي بتحلم الارنبه ” جودى ” انها تروحها وتحقق حلمها فيها بكونها أول ظابط من الثدييات الأليفة .. ومش اى ثدييات دى الكيوت بتاعهم .. حلمها تروح زوتوبيا .. الحلم اللي بتعيش فيه كل الحيوانات في ود وانسجام .. مفيش غريزة توحش .. ولا عالم الغاب ولا جو البقاء للاقوى .. عالم بتعامل فيه الحيوانات الأليفة مع المفترسة .. وبتعيش الثدييات مع القوارض .. عالم فيه ان الطبيعي الحيوانات تلبس هدومها ومن الإباحيه انها تتعري !

عامة إنت في افلام الكرتون بتبقي متقبل أي فكرة . أى كانت جنونها … خيالك بيحصله توائم لحظي بمجرد ما بيبدأ الفيلم وبتعيش معاه بكل تفاصيله .

إعلان فيلم Zootopia 

 

معلومات عن فيلم Zootopia

  • وفي فيلم Zootopia  كلمة التفاصيل هيا مفتاح كلمة السر .. إن لم يكن السبب الرئيسي لترشحيه للأوسكار ويكسبها بكفاءه .
  • في الفيلم ده بنلاحظ تفاصيل بيركز عليها الإخراج بعدسة التصوير .. وكأنه بيعمل زووم عشان نركز وننبهر ..
  • فهنلاقي مثلا إن جوة زوتوبيا فيه مدينة للقوارض اسمها ” littel rodentia ” وان البنك اللي بيشتغل فيه الفيران اسمه ” lemming brother bank ” والتليفون اللي ماسكاه الأرنوبة عليه جزره مقطومه واللي بيفكرنا ب I carrot اقصد ال I phone ..
  • قناه التليفزيون اسمها ZNN بدل CNN !
  • الحركة قوية لان مفيش تعبير يقدر يوصف اللي المخرج عمله .. في لقطة المفروض ان المخرج بيعمل زووم علي افلام DVD
  • مغيرين في اسماء افلام مشهوره ومبدلين البوسترات الرئيسية بحيوانات ..
  • فهنلاقي ان big herro 6 متبدل ل pig herro 6 وعليه خنزير ..
  • وفيلم wreck it ralph متبدل ل wreck it rhino وعليه وحيد قرن ..
  • وفيلم Frozen بقي floatzen وآنا وايلسا بقوا فيلين ضغيرين … فيلم Gigantic بقي Giraffic .. فيلم Tangled عملوه Wrangled
  • المدهش ان فيلم Moana اللي نازل نفس السنه . وعرضه تم بعد عرض فيلم زوتوبيا الرسمي بتسع شهور جايبين البوستر بتاعه ومغيرين أسمه ل Meowana مع تبديل ان قط هو اللي في البوستر .
فيلم zootopia
فيلم zootopia

اللي هو بجد إنت بتتفرج وغصب عنك هتركز … انت كمتابع للافلام دى خصوصا انك عارف بوستراتها هتخليك تتنح . ثم تنبهر . ثم هتقولهم ( يا ولاد اللذينه عملتوها ازاى ؟ ) ..

إذا كان للتفاصيل نصيب الأسد في الانبهار .. فقصة الفيلم اللذيذة جدا ليها بردو نصيب كبير ..

الارنبة ” جودى ” أثبتت إن طالما إنت مصر علي حلمك هتقدر توجد الحلول لكل المشاكل اللي هتواجهك .. فقدرت تتغلب علي صغر حجمها وضعفها وتتخرج وتبقي ظابط … قدرت تثبت انها كفء .. أثبتت ان الارانب ( اللي هم الطيبين ) مش اغبيا .. بل اذكياء وجدا كمان ..

وكذلك الثعلب ” نيك ” اثبت ان لو الظروف سمحت فالوغد هيكون شريف ومحترم جدا ..

الفيلم ببساطة لو هنقيسه علي حياه البشر ..

فالطيبه لا تعني الغباء .. و ان الظروف الصح لو أُتيحت لشخص فهتكون كفيلة بانها تبدله وتظهر معدنه ..

* اجمل جملة اتقالت في الفيلم .. هي جملة ” نيك ” لجودى : ” لا تسمحي لأحد أن يظن أنه تمكن منك “

فيلم zootopia
فيلم zootopia

حقيقي هو ” نيك ” جاب خلاصة الحياه في جملة قصيره .. الدنيا هتمرمطك وهتشوف منها بلاوى بس المهم متخليش حد يفتكر انه قدر عليك ..

* الخطاب الختامى لجودى بيلخص الفيلم كله او الحياه عموما بتقول فيه :

“الحياه اعقد من مجرد شعار نتداوله . الحياه الحقيقية ماهي الا الفوضي

لدينا حدود ونتركب جميعنا الأخطاء.. لذا فجميعنا لدينا أشياء مشتركه

وكلما حاولنا ان نفهم بعض اكثر .. كلما أصبحنا استثنائيين ..

لذا اتبع قلبك واعلم ان التغيير يبدا بك “

اللي ماشفش الفيلم .. احب ارشحوله من قلبي لانه فيلم جميل يستحق المشاهدة والإشادة

 

بقلم : وسام عبد الوهاب

Behind The Scene
بيهايند هي كيان سينمائي مصري متخصص فى مجال ترشيحات الأفلام والمسلسلات وتقديم تغطية لكافة الاخبار الفنية في السينما والدراما