مراجعات

مراجعة فيلم : Wonder Woman

قبل ما ابدأ تحليلي ورأيي في الفيلم عايز اقول ان انا مش هتكلم بس كمحب للأفلام بل هتكلم كفان بوي لـ DC ومتابع شغف للكوميكس والكرتون وعاشق لشخصية Wonder Woman، قبل ما ابدأ الريفيو حابب اقول إني سعيد برؤية شخصياتي المفضلة على الشاشة والفيلم ده أتاح لي الفرصة إني اشوف شخصية من الشخصيات دول بقصة انا شفتها قبل كده في الكوميكس وأفلام الكرتون ولكن تم إعادة اختراعها في الفيلم ده لتشمل حاجات جديدة ولتكون شئ مستقل بذاته وده شئ اقدر احترمه.

 

هتكلم اول حاجة عن الاكشن وده السبب الأكبر لمشاهدة النوع ده من الأفلام وهو بكل صراحة ما توقعته في فيلم لشخصية Wonder Woman كان سريع كان مشوق كان مناسب للأحداث قدر يوصلنا قدرات ديانا كبطلة وكمحاربة كان متصور بشكل كويس إستخدام الـ Edits والـ Slow Motion كان رائع الحقيقة وده شئ مش بشوفه كتير في أفلام الاكشن اليومين دول مع الاستخدام المكثف للـ Slow Motion في كثير من الأفلام وده شئ اقدره في الفيلم ده.

ثانياً ودي حاجة لفتت نظري جداً وهي الموسيقي التصويرية او الـ Score وكعادة افلام DC فهو عظيم جداً جداً جداً مناسب للاجواء بتاعت الفيلم وشخصياً شايف ان الموسيقي أدت روح مميزة للفيلم وحسستني كمشاهد بالحماس والحيوية وهيكون ليها مكان في الـ Play List بتاعتي.

ثالثاً الـ Cast والأداء التمثيلي بالنسبالي كريس باين بدور ستيف تريفور كان الابرز في الفيلم خصوصاً وإني من معجبين كريس شايفه عمل دور رائع للغاية، أما طبعاً بخصوص الشخصية المحورية ديانا أو Wonder Woman واللي قام بتأديتها جال جادوت شخصياً شايف جال قامت بدور جيد حسستني ان شخصية ديانا قد جأت للحياة من صفحات الكوميكس للشاشة الكبيرة وقدرت جال انها تتقمص روح Wonder Woman ساعدها على كده طبعاً جمالها وتعبيرات وشها وطريقتها في الكلام واختيار موفق جداً من المنتجين اختيارها برغم إني شايف ان شخصية معقدة زي ديانا محتاجة ممثلة اقوي من كده في لحظات كتيرة كان باين ضعف أداء جال وأتمني انها تحسن من نفسها في المستقبل، اما عن بقية الـ Cast شخصياً مش شايف اي تأثير ليهم مكنش في مساحة لأي شخصيات غير شخصية ستيف وديانا وانا شخصياً مش شايفه عيب لأن الفيلم في الأساس لتقديم شخصية Wonder Woman لعالم DC السينمائي.

رابعاً هتكلم عن اكتر حاجة حببتني في الفيلم وهي شخصية ديانا بحد ذاتها كنت مستمع للغاية وانا بتفرج على شخصيتها البريئة الطفولية وهي بتستكشف العالم الجديد وبتعيد إكتشاف نفسها كامرأة وكمحاربة وكانسانة كان رائع رؤية تصرفاتها التلقائية في المواقف المختلفة وهويتها كبطلة وهي بتتشكل وتطور شخصيتها مع مرور أحداث الفيلم وساعد على كده ملامح وجه جال جادوت البريئة وزي ما قلت كان اختيار موفق، وشخصية ستيف الشجاعة اللي ساعد ديانا على اكتشاف نفسها وان قناعاته الشخصية ألهمت شخصيتها والديناميكية بتاعتهم طول الفيلم كانت رائعة، الكيمياء المميزة بين جال جادوت و كريس باين ساعدت الفيلم جداً.

خامساً المؤثرات والتصوير ان شخصياً شايفه كويس إلى حد ما هو مكنش مميز هو تماماً اللي تتوقعه من فيلم زي ده مفيش كادرات تثير الدهشة يعني ولا تصوير مبهر ان شايفها شئ متكرر في أفلام السوبرهيروز نفس الكادرات ونفس المؤثرات اتمني

يبقي فيه إبداع اكتر من كده في الحاجات دي خصوصاً ان المخرجين عندهم مساحة يعملوا اكتر من كده بكتير.

سادساً القصة ان شايفها كان فيها عوامل كتيرة من الكوميكس قدرت تخلق أجواء جيدة لينا كمشاهدين ان احنا نستكشف ونتابع شخصية ديانا، الأحداث كانت سريعة وده شئ سئ كنت محتاج تفاصيل اكتر غير ان فيه عدم منطقية في أحداث كتيرة حاسس ان كان فيه تسرع كبير و زي ماتقول Skip لحاجات بشكل يحسسك ان صناع الفيلم كانوا مكسلين يطلعوا بتفسير او يعملوا مشهد زيادة عشان يحسنوا من جودة فيلمهم وده شئ بقي اعتيادي في الأفلام اللي زي دي وأمر حزين الحقيقة لأن معظم المشاهدين شكلهم مش مهتمين بتفاصيل زي دي، خصوصاً في الفيلم ده بالذات التلت الأخير من الفيلم حسيت انه معمول بإستعجال كبير وبشكل متناقض وغير منطقي لدرجة أفسد فيها استمتاعي ببقية الفيلم وده أمر متكرر مع افلام DC حشو الفيلم بأحداث سريعة وفي النهاية عدم معرفة ازاي تقدر تنهي الفيلم فبيقدمولك نهايات غير مرضية وده اللي حصل في الفيلم ده.

تقييمي النهائي : 7.5 من 10

“العالم لا يمكن إنقاذه سوي بالحب”

Behind The Scene

بيهايند هي كيان سينمائي مصري متخصص فى مجال ترشيحات الأفلام والمسلسلات وتقديم تغطية لكافة الاخبار الفنية في السينما والدراما

ذات صلة

اقرأ ايضاً
إغلاق
زر الذهاب إلى الأعلى