مراجعات

مراجعة فيلم Mulholland Drive

مراجعة فيلم Mulholland Drive 1

لا توجد فرقة، فكل شئ مسجل على شريط

معتقدش ان فيه فيلم قدر يعبث بعقول ومخيلة المشاهدين بالطريقة دي وبالتأثير ده زي Mulholland Drive لينش فعلياً اخد عقلك ولعب بيه الكورة خلاك تدوخ وتتوه في سلسلة من المشاهد العظيمة والمثيرة مليانة رمزيات وأسرار وحاجات غير مفهومة ولكنها بتشدك ليها زي ما النار بتشد البعوض مشاهد متقنة الإخراج بشكل قلائل من العظماء يقدروا عليه قدر يشركك في كل لحظة من تصوره للفيلم كأنها رحلة في عالم مختل بعيد كل البعد عن عالمنا ولكنه والعالم الحقيقي وجهين لعملة واحدة. 

كنت بتفكر فيه ايه يا لينش لما كتبت الفيلم هل بمدي رعب مدينة هوليوود ورعب المصاعب في الطريق للنجومية؟ إختفاء كل القيم الأخلاقية من المجتمع؟ سطوة الرأسمالية والفساد حتي في الفن؟ بس لينش متكلمش أصلاً عن الأفكار دي هو مجرد حط عليها شوية ضوء وساب عقلك يقوم بالباقي وده سر ليه Mulholland Drive معشش جوه عقل اي حد شافه سيل من الأفكار والفلسفة بتدخل جوه دماغك بدون بذل جهد في التأكيد على الأفكار دي انت كمشاهد بتملي الفراغات بنفسك عبقرية صافية من لينش.

لينش عمل مزيج إخراجي أشبه بكوكتيل من الحبوب المهلوسة على هيروين مع شوية حشيش اسلوب الـ “الفيلم نوار” مع البوب أرت في الـ Cinematography حاجة تبهر العين العنف المفاجئ والرعب الصافي في مشاهد كتيرة تصويره لتبدل المشاعر من الحب الغير مشروط للكره والشروع في القتل رمزيات فوق رمزيات خلق عالم سيريالي ملهوش مثيل في السينما.

حبكة الفيلم بسيطة لدرجة التعقيد جملة متناقضة لكنها صحيحه دايفد لينش قدر يخلق السهل الممتنع بكل المعاني وكإن لسان حال دايفد لينش : “الموضوع بسيط لكن لو ركزت مش بس ركزت لا ده انت تسيبلي دماغك خالص انا مديك كل حاجة انت محتاجها عشان تحل اللغز انت اللي مشغول بكل شئ تاني.” قدر يوصل لحاجة فوق الـ Mind F**k بشوية.

انا بصراحة مهما ما اتكلمت مش هقدر اوصفلك التجربة اللي هتعيش فيها وانت بتشوفه كل حاجة فيه مثالية الحوارات والمونولوجات والسياق اللي بتتقال فيه لوحدها فن، التشويق المتواصل لحظة ورا لحظة ورا لحظة هيسيبك فاتح بوقك بعد نهاية الفيلم من الإنبهار التام، الشخصيات عظيمة وغريبة أشبه بالكرتون عن الشخصيات الحقيقية، ناعومي واتس ولورا هارينج أداء عظمة على عظمة والكيميا ما بينهم غير طبيعية وباينه جداً خصوصاً في مشاهد الحب والغيرة.

بجد يعني انت مستني ايه؟ لو مشفتوش سيب اي حاجة انت بتعملها واي فيلم في مخططاتك واتفرج عليه دلوقتي اضمنلك انه هيكون احسن منهم بمراحل ومتنساش تقولي رأيك.

بقلم : باسم عماد 

مراجعة فيلم Mulholland Drive 2

Behind The Scene
بيهايند هي كيان سينمائي مصري متخصص فى مجال ترشيحات الأفلام والمسلسلات وتقديم تغطية لكافة الاخبار الفنية في السينما والدراما