بما انك منتظر فيلم ولاد رزق 2 يبقي انت من جمهور أفلام الأكشن والحركة وكمان غالباً انت شوفت الجزء الأول وعجبك…
- فيلم ولاد رزق 2 من التريلر يبدو انه وجبة دسمة جداً بالنسبة لفيلم اكشن وحركة واللي هيدعم النقطة دي اكتر من الجزء الأول هو التقنيات اللي اتطورت بمرور الوقت.
- الجزء الأول كان الموضوع أقل توسع من التاني ودا اللي شوفناه من التريلر بمعني ان في اكتر من خط لسير الأحداث ودا هيفتح المجال لصراعات بين الممثلين اكتر وعرض جوانب درامية بأريحية أكبر.
- أحمد عز مؤخرا أفلامة كانت توب فى شباك التذاكر ودا ان دل علي شئ يدل ان عز ممثل اكشن ممتاز ودا بيظهر من تجربة للي بعدها.
- وجود أحمد الفيشاوي وكريم قاسم وأحمد داوود واللي بيعتبروا من مواهب جيلهم وكانوا إضافة للجزء الأول وبالتالي وجودهم هنا هيكون أكتر تأثير.
- عمرو يوسف مدرسة مختلفة وله جمهوره وأعماله المنفردة واللي حقق بها نجاح وتنوع مدارس التمثيل في الفيلم هيكون نقطة قوة له مش العكس.
- تواجد خالد الصاوي بالفيلم كفيل إنه يدخلك الفيلم سينما، حد بثقل الصاوي فنيا بيشارك في بطولة فيلم زي دا يبقي أحنا غالبا هنشوف إنفجارتمثيلي واحشنا من شخصية شريف الكردي في الفيل الأزرق .
ليه لازم تشوف فيلم الفيل الازرق 2 فى السنيما
- الأدوار الثانوية في فيلم ولاد رزق 2 لمواهب زي إياد نصار و باسم سمرة حقيقي من النقط اللي حمستني جدا للفيلم لأن المشاهد الإنتقالية واللي بين السطور هتكون أمتع لحظات الفيلم.
- مشاركة محمد ممدوح بدور من أدوار الشر مجددا شئ كنا بنفتقده من موهبه زيه ودا هنشوفه في الفيلم ضد ولاد رزق ومنتظر جدا مشاهد تجمع مواهب الفيلم وتكون بقالب درامي أكبر.
- ضيف الشرف واللي هو آسر ياسين واللي غايب ع العين من سنة فاتت من الحاجات اللي متحمس أشوفها ومواجهة أطراف الفيلم.
-
وجود الكوكبة دي من النجوم والمواهب كفيل انك تعيش تجربة ممتعة علي مدار تواجدك بدار العرض لأنك وبكل بساطة كل 5 دقايق هتشوف مدارس تمثيل مختلفة وهتشوف تباين أداء مغاير للي شوفته من المشهد اللي قبله.
- طارق العريان دي مش التجربة الأكشن الأولي له، نجح له أفلام جماهيريا زي الخلية وفنيا زي تيتو وجماهيريا وفنيا زي ولاد رزق يعني بمعني أصح طارق من المخرجين اللي أعمالهم تترواح بين الجيد والجيد جدا كتجربة ممتعة كأدني حد.
- صلاح الجهيني مؤخرا قدم سيناريوهات جميلة زي الخلية و 122.
- في المجمل لو انت من عشاق أفلام الأكشن والحركة والإثارة برشحلك فيلم ولاد رزق 2 جدا لأنه هيشبع كل احتياجاتك.
