مميزمقالات

ليه لازم تشوف فيلم الفيل الازرق 2 فى السنيما

                                  تعالي هقولك … تعالي مفيش حرق متقلقش .

– لو انت شخص ممكن يزهق لأن الفيلم طويل احب اطمنك الفيلم ساعتين و ١٠ دقايق تقريبا ومن امتع ما يكون ، ودا بسبب التفاصيل الممتعة والموسيقي الجميلة + تقسيم الفيلم لمراحل جعل من فيلم اكتر من مرحلة فا ذهنيا بيكون دا ممتع ليك كمشاهد وبيحفزك للي بعده.

– لو انت حبيت الجزء الاول فا انت فعليا هتعشق التاني .

– لو خايف من السيناريو أنه يكون فارغ بسبب عدم استناده لرواية زي الجزء الاول فا انا بطمنك السيناريو دسم متقلقش.

– لو انت مش بالع فكرة عدم وجود الصاوي في الفيلم فا دا لأنك مش واخد بالك أنه اتعالج واحنا مش هنبلع نشوفه تاني بيعاني نفس المعاناة لاننا هنشوف نفس الفيلم كده تاني ، وبالتالي وجود هند صبري اللي حرفيا ابدعت ف الفيلم ب اكتر من لون كمان حاجه تطمن .

– لو عاوز تعيش تجربة بصريا ممتعة + فيلم رعب نفسي مرهق+ ابعاد دراميا اتقدمت بأفضل شكل + رسائل هادفة من التجربة كتير ولو انها مش مباشرة، هتلاقي كل دا في الفيل الأزرق.

– أحمد مراد قدم حالة محترمة اوي رغم كل القلق اللي كان موجود عند الجماهير، قدر يقدم سيناريو جيد جدا ، واللي سببه كان تعمقه اكتر ف الموضوع ، هنا كان الموضوع مش بدائي زي الجزء الاول ، لا دخلنا العالم حرفيا والورق مع الوقت بدأ يتكشف وعلي الرغم من التويستات الكتير اللي بالفيلم إلا أنه نجح ف توضيحها .

– مروان حامد وتقدم مستمر وكل تجربة بيثبت أنه هينهي مسيرته واسمه هيتحفظ ف التاريخ لأنه مش بيعمل أفلام والسلام ، تجربة فيها كم كبير من الصعوبات قدر يخرج منها تجربة ممتعة جدا علي الرغم من وقعها الصعب ودا ف حد ذاته فن.

– هشام نزية والتوابل وجمالها، حقيقي هشام مبدع اوي والموسيقي ضافت للتجربة دي كتير جدا وخصوصا في مشاهد الترقب اللي نفذها بكل حرفية.

– لما تلاقي فيلم فيه ” مروان حامد ، أحمد مراد ، هشام نزية” ادخله سينما متقلقش ، لأنه ع الأقل هيكون تجربة جيدة وافضل من اي تجربة عربية بتنافسه.

– كريم عبدالعزيز في تصاعد من يوم ما دخل المجال دا وهيستمر ف كدا لحد ما يعتزل ، كريم بيمثل بعيونه والله .

– هند صبري كان علي عاتقها حمل كبير واتزال خلال يومين بس من آراء الجماهير اللي بكل تأكيد تستحقها، هند موهبة انفجرت ف الفيلم ولمراد و حامد الفضل في المساحة اللي اخدتها.

– نيللي من نقاط قوة الفيلم … أه تعالي هقولك لية، نيللي ظهرت فعليا ع الشاشة مش ربع الوقت اللي هند ظهرته، ورغم دا قدمت أداء ممتاز حقيقي ف كل ثانية ظهرت فيها، وانا بعتبر الأدوار دي سلطات الفيلم ، يعني لو مش مظبوطة الأكلة هتبقي بايخة.

– إياد نصار اقدر اقول إنه قدم أداء جيد جدا مع أنه مظهرش نص ظهور شخصية محمد ممدوح ف الجزء الاول.
عندي تعقيب بسيط ع الأدوار يعني، كنت اتمني أن مروان ومراد يتيحوا مساحة لشخصية هند كفريدة اكتر ، كان الفيلم هيبقي أقوي دراميا ، ودا رأي شخصي ليس إلا .

-بس انا خلصت يلا ع أقرب سينما ادفع لك ٨٠ ج عشان الفيلم قريب هيقفل ال ١٠٠ مليون وغالبا هيعدي كمان ووقتها هنفرح لأنه عمل فني مش عمل ساذج.

Bata Louny (احمد علي)

عاشق للسينما الواقعيه وعاشق لكرة القدم.

ذات صلة

زر الذهاب إلى الأعلى