لا يوجد جريمه كامله .. تذكر هذا جيداً – Rope

قصة الفيلم: زميلين بيتفقوا علي قتل زميلهم بدون اي سبب للجريمه … فقط بسبب حبهم لارتكاب الجريمه الكامله وتجربة احساس الجريمه ..

الفيلم بيوضح لينا وجود عقدة الاله عند بعض الناس وتفكيرهم في انهم اعلي من كل البشر ومن البشر المنتقاه من الرب لتخليص العالم من الباقيين العاديين اللي هما الغير مفكرين او الغير مثقفين او تفكيرهم طبيعي والفيلم بيبن مدي التناقض الكبير في شخصيه الناس دي لان مرتكب الجريمه والمدبر ليها كان اقل شأناً وعلماً من المجني عليه ولكنه عمل كده بدافع الحقد لا اكثر واقنع نفسه بانه افضل منه وعايز يعمل كده لمجرد فعل الجريمه الكامله مش اكتر …

اداء رائع لجيمس ستيوارت كالعاده … والاداء الاكثر قوه كان لجون دال الشخص المتنمر المغرور الذي يظن نفسه الافضل والاذكي وسيقوم بالجريمه الكامله لدرجه انه بيستدعي استاذه روبرت (ستيوارت ) عشان يتحداه ويشوف هو هيكتشف الجريمه ولا لا … فارلي جرانجر قدم اداء رائع جداً في اداء شخصيه الشخص المتردد ضعيف الشخصيه اللي بيغلب عليه الطابع الطيب …

الحوار هو اكثر ما يميز الفيلم .. قمه العظمه تكمن في الحوار والمواجهات ما بين الشخصيات وهنحس بقدر النفاق والتصنع والتجمل اللي في طبع اغلب البشر

السيناريو مكانش فيه تصاعد احداث كبير او تطور نظرا لقصر مده الفيلم وهو ساعه وتلت وبيدور في غرفه واحده ولكن التطور الحقيقي كان تطور الشخصيات وانفعالاتهم الي ادي لتطور الاحداث والتسلسل اللي وصلت ليه نهاية الفيلم يعني نقدر نوصف الفيلم بانه تسلسل لمجموعه من الانفعالات …

الاخراج كالعاده مميز من ملك السابسينس الفريد هيتشكوك قدر يوصلنا مشاعر الحقد في شخصيه جون دال وانانيته وعقدة الاله اللي عنده والنفس البشريه وكميه الشر اللي ممكن تكون جواها وهيوصل لايه الغرور ده ؟