مقالات

كل شئ عن انجمار بيرجمان

 انجمار بيرجمان مخرجي المفضل بسبب أفكاره وطريقة طرحها ونظرته السوداويه للحياه واللي بتفق معاها بشكل كبير جداً عشان كده هو الأقرب ليا من بين الخمسه، المقال منقسم لأربع اجزاء :-

انطباع المشاهد – الأفكار والأسلوب – مميزات – عيوب

1 – ( انطباع المشاهد عن انجمار بيرجمان )

احب اقول ان بيرجمان فيلسوف مش متفلسف زي مابيتم وصفه اوقات وحتي قريت في مقال قريب ان في حد وصفه بالمتفلسف اما الفيلسوف الحقيقي فهو وودي الن … انا نفسي معنديش اعتراض علي فلسفة وودي لو هناخدها كمثال بالعكس بحبها جداً بشكل لا يوصف وودي من مخرجيني المفضلين وهياخد حقه في الكلام لما اتكلم عن الخمسه المفضلين ليا بعد دول مستقبلاً ان شاء الله … بس هحب اقول رأئي اولاً فلسفه وودي ممتعه جداً وسهل التواصل معاها لأنها فعلاً بتعبر عنه وعن افكاره ثانياً لأنها واقعيه وملموسه نقدر نقابلها في حياتنا اليوميه ونركز علي واقعيه … بيرجمان فلسفته هي العدميه … وخلينا نتفق علي انها صعب تتوجد في الحياه الواقعيه بشكل (ملموس ) بمعني ايه ملموس ؟ يعني مثال بسيط انا واحد خايف من مواجهة الموت اكيد مش هيطلعلي الموت متجسد ولابس قناع زي الختم السابع وهواجهة واتحاور معاه … عندي ذكريات بتطاردني وماضي بيأثر علي الحاضر اكيد مش هيطلعلي فئه غريبه من الناس متجسده في ذكرياتي واوهامي ومخاوفي زي ماحصل في ساعة الذئب … النوع ده من التقديم في ناس مش بتحبه وبتوصفه بإنه فلسفه زايده عن الحد وده شئ مش صحيح بل بالعكس التجسيد ده من اكتر الحاجات العبقريه اللي بشوفها دايماً في السينما كأنك بتتخيل مشاعر او معاني قدامك علي شكل شخص وبيتم الصراع معاه وبتقدر تتكلم وتواجه ده في حد ذاته شئ عظيم وهو براعة المخرج للتجسيد ولو هنتكلم عن البساطه في التقديم فعندنا التوت البري ناقش الصراع مع الموت والاوهام والذكريات بشكل عظيم جداً وهي نفس الأفكار بس بتناول مختلف ومن غير ابتذال او فلسفه زايده علي حسب وصف ناس لأفلام بيرجمان وده بيدل إن بيرجمان بيقدم النوعين … اولاً النوع الفلسفي اللي اوقات كتير بيكون تقيل والسهل الممتنع …. ومينفعش اقول ان وودي فيلسوف وبيرجمان متفلسف اولاً لأن بيرجمان فلسفته كانت عن الحياه بشكل شامل واعمق وكانت من خلال وحدته اللي عاشها لفتره طويله وانعزاله عن الناس وطفولته اللي عاشها مع اب متدين متشدد …. اما وودي ففلسفته بتركز علي المشاكل المجتمعيه معظم الوقت او مدي ارتباط الشخص باللي حواليه والنقطه التانيه ان وودي نفسه بيشوف بيرجمان هو افضل صانع للسينما ودايماً نشوف كده سواء في افلامه زي ماذكره في اني هول او في لقائاته التلفزيونيه وحتي في محاكاة لبيرجمان زي تجسيد الموت والرقصه الأخيره في فيلم Love and death .

ومقولته الشهيره …

ربما بيرجمان هو أعظم فنان في صناعة الأفلام، ضمن كل الإعتبارات، منذ إختراع كاميرا الأفلام المتحركة”.

وده بيدل علي تأثر وودي الشديد بأفلام بيرجمان ….

كره الجمهور لأفلام بيرجمان بيتقسم لنوعين انواع …

– النوع الأول اللي بيكره الفلسفه اللي بيشوفها زايده عن الحد ومبيتحملهاش

– النوع التاني اللي بيعترض علي افكار بيرجمان بما ان حواراته في معظم افلامه بتتكلم عن عدمية الإله وبيشوف بيرجمان مبيقدمش غير النوع ده

– بالنسبه للنوع الأول فده تفضيل شخصي مينفعش الوم حد عليه واقوله انت ليه مبتحبش فلسفة بيرجمان .. هو حر في مشاهداته وفي تفضيلاته لكن مش حر يقلل منه لمجرد انه مش علي هواه الشخصي

– بالنسبه للنوع التاني فانا مينفعش اقول ان المخرج ده سئ او الفن اللي بيقدمه سئ لمجرد انه بيناقش افكار انا ممكن متقبلهاش … انت حر تتقبل او ترفض لكن مش من حقك تفرض علي المخرج تقييد افكاره ونقطه تانيه مغلوطه ان بيرجمان مبيقدمش غير نوع الأفلام اللي بيدور حول عدمية الإله ودي نقطه مغلوطه وفكره غلط عن بيرجمان .

2- ( أفكار واسلوب انجمار بيرجمان )

بيرجمان افكاره دايماً سوداويه وعنده نظره تشائميه للحياه بيركز علي الجوانب المظلمه والأبعاد النفسيه عند البشر … بيتكلم عن العدميه – الشر – الموت – الإنتقام – الندم – الذكريات – الكوابيس – الصراع النفسي الداخلي – الصراعات الخارجيه مع البشر .. وده ناتج عن وحدته واللي ادتله مساحه اكبر في التفكير والتعمق في خبايا النفس البشريه … اما عن اسلوبه اللي اعتمد عليه بشكل كبير جداً في معظم افلامه فهو مصطلح اطلقت عليه التعريه … تعرية الحقايق ، تعرية الأشخاص وتعرية المشاعر … والتعريه في افلام بيرجمان بتتم بشكل تدريجي بسيط يكاد لا يلاحظ من البدايه ومع التقدم في السيناريو بنوصل لوقت الذروه وهو وقت ظهور الشخصيات دي علي حقيقتها وظهور مشاعرها الداخليه وخباياها وتناقضاتها وصراعاتها سواء مع نفسها او مع غيرها وده بيكون بسبب مؤثر في السيناريو بيحصل عشان يبدأ الصراع ده في التجلي .. مبدئياً بيرجمان بيبدأ بتقديم كل الشخصيات سعيده وبدون أي مشاكل ، جو بيملؤه الحب والسعاده والراحه والموده مابين الأهل والصحاب والزوجين وحتي مع النفس
… العلاقات بتكون مرنه جداً لدرجة إن المشاهد بيوصله ايحاء ان كل شئ مثالي ومفيش اي مؤثرات هتعكر الصفو والسلام النفسي ده .. بعد تقديم الشخصيات بيبدأ بيرجمان يعري كل شخصيه علي حقيقتها وبيسلب كل العناصر اللي ادت الي تجُمل الشخصيه دي وظهورها بشكل مثالي وبحبكه ذكيه جداً بيقدر يظهر ده عن طريق مشهد حواري او عن طريق ذكري مؤلمه أو مرض نفسي

هذكر 4 انواع من الصراعات في افلام بيرجمان واللي اعتمدت علي فكرة التعريه …

1 – Winter light – الصراع الداخلي

– الكاهن هو اكتر شخص مؤمن بالرب فما بالك لو الكاهن ده ايمانه اضعف من الشخص العادي !

في الفيلم ده اكتر من مشهد بيبين مدي تناقض النفس البشريه ولكن هركز علي مشهد واحد بسيط وهو دخول شخص وزوجته لغرفة الكاهن عشان يطلب مساعدته .. الشخص ده بيشتكي من الظلم اللي بيقع علي الناس والعنف اللي بيحصل في البلاد وبيتهم الرب بالصمت عن الظلم ده وبيواجه مخاوف كتير مش قادر يتعايش معاها ..الكاهن بيصبره ويقوله ان الرب موجود واكيد هو رحيم وليه حكمه عشان يهون علي الشخص ده ويخليه مطمئن … بعد انصراف الشخص وزوجته بيظهر لينا مدي تناقض الكاهن وانه هو نفسه مش مصدق الكلام اللي بيقوله ولا مؤمن بيه وبيواجه نفسه ومراته السابقه بالحقيقه دي ومن هنا بتبدأ تعرية شخصيه الكاهن وظهور حقيقته البشعه طوال الفيلم علي عكس ماظهر في البدايه بيطلب من الرب المغفره لكل من في الكنيسه وظهور الخشوع والانقياض الخالص للرب …. في الفيلم ده او في المشهد ده بالأخص كان عنصر التعريه والمؤثر هو الحوار اللي دار مابين الكاهن والراجل وزوجته … والصراع هنا كان صراع داخلي بيوضح ان اكبر عدو للإنسان هو نفسه …

2- Through a Glass Darkly – الصراع مع الرب

اسره بسيطه مكونه من 4 افراد … اب وابنه وزوجها واخوها .. بيقضوا اجازه في جو يملؤه الحب والسعاده واجواء عائليه لطيفه … بيبدأ عنصر التعريه في الظهور لما بيبدو علي الأب القلق من مرض بنته كارين اللي مصابة بمرض نفسي وبيتكلم في الموضوع ده مع جوزها اللي بيؤكد انها اتعالجت خلاص … وبعد حوارهم ده بيبدأ ظهور كل شخصيه علي حقيقتها …. الأب اللي بينتابه الخوف وعدم الإيمان بأي شئ والزوج اللي بيخشي مرض زوجته مره تانيه والإبن وعصيانه واخيراً مرض كارين النفسي اللي بيخليها تتخيل اشياء مش موجوده واتدعاءها بظهور الإله علي شكل عنكبوت … المؤثر وعنصر التعريه هنا كان المرض النفسي اللي عند كارين وهو كان نتيجة تعرية كل الأشخاص سواء كان بسبب خوفهم من ظهور المرض ده تاني او عدم مقدرتهم علي مواجهة حقيقة نفسهم او اتدعاء كارين بزوال مرضها ورجوعه مره تانيه … والصراع هنا كان صراع مع الإله وتجسيده بإنه هو الشر المطلق وهو سبب الرعب والفزع عند البشر

3 – Autumn Sonata – الصراع مع البشر

هنا عندنا زوج وزوجه بيقضوا حياه روتينيه مش هقدر اقول سعيده … وبيطغي جو الغموض بسبب عدم معرفة المشاهد طبيعة العلاقه بين الزوجين لأنها في المجمل متبانش سعيده او مش مثاليه … هنا المشاهد بياخد انطباع اولي عن التجربه اللي قدامه وهو جمود المشاعر .. ولكن مع رساله من الأم للزوجه بتقول فيها انها هتزورها بيبدأ المشاهد يحس بوجود المشاعر وتجسيدها علي شكل لهفه وفرحه من الزوجه لرؤية أمها وبيسود الاطمئنان اكتر لما الزوجه تستقبل أمها بحضن وابتسامه عريضه والشعور بيكون متبادل … بيبدأ عنصر التعريه في الظهور لما الأم بتكتشف وجود بنتها الصغيره المصابه بإعاقه وبيظهر ده علي ملامحها وطريقه كلامها وبيبان انها بتكرهها وبيبدأ الظهور الصريح لتزييف المشاعر لما الأم بتقابل البنت دي … بعدها بتسترجع البنت وأمها ذكريات ليهم وبيبان مدي كره البنت لأمها الأنانيه وبتبدأ المشاحنات مابينهم … في الفيلم ده كان بداية المؤثر وظهور عنصر التعريه هو تزييف المشاعر واسترجاع الذكريات اللي بعدهم تم تعرية الشخصيات دي وكشفها علي حقيقتها واظهار مدي تناقضها واللي اي مدي ممكن الإنسان يوصل الي انه يزيف مشاعره او يعبر بشكل منافي تماماً عما بداخله لدرجة إن أم وبنتها يظهروا الحب وهما بيكرهوا بعض كره شديد … والصراع هنا كان صراع خارجي مابين البنت ووالدتها

4- Hour of the wolf – الصراع مع الذكريات

عندنا هنا شخص وزوجته بينعموا بحياه هادئه حتي ظهور عائله غريبه التصرفات بتحط الزوجين في مشاكل وبتحط الزوج نفسه في صراع مع نفسه بيبدأ لما العائله دي بتدعوهم للأكل في القلعه بتاعتهم من هنا وبيبتدي صراع الزوج مع نفسه … بنروح لمشهد للزوج والزوجه وخوف الزوج من ما يسمي بساعة الذئب وساعة الذئب هنا كانت رمزيه عن مطاردة الذكريات والأوهام والمخاوف للزوج ولما بدأت بدأ الزوج يخوض مغامره في صراع مع اوهامه وذكرياته وشعوره بالندم وتم تجسيد الذكريات والأوهام والمخاوف هنا علي شكل العائله دي وفي مشهد جبار بيبين مدي الصراع بين اوهامه لما شخص من العيله بيقوله 
Now you are yourself and yet not yourself …

3 – ( مميزات )

اللي ميز بيرجمان عن غيره من وجهة نظري هو تميزه في طرح افكاره عن اي مخرج تاني واستخدامه دايماً لعدد قليل من العناصر زي البشر في افلامه عشان يركز عليهم ويتعمق في ابعادهم اكتر وطرحه للسوداويه بشكل استثنائي وهو اعظم واحد يقدم افكار سوداويه ويتعمق في النفس البشريه بلا اي شك وتأكيداً علي كده إن دايماً افلامه بتعلق مع المشاهد لفتره طويله جداً وبتدعوه للتفكير وصانع العمل تأثيره بيكمن في انه يسيب تأثير علي المشاهد ميبقاش مجرد اتفرج علي التجربه وتناساها … اما اكتر حاجه بتميز بيرجمان هو انه سيناريست عظيم كتب معظم افلامه بنفسه وده بيدل علي إن دي افكاره اللي بتعبر عنه بدون اي اتدعاء للفلسفه وبحترم جداً المخرج اللي يكون كاتب افكاره بنفسه ويعبر عنها بالشكل اللي يديه الحريه الكامله وميتقيدش بأي حدود ودايماً تظهر عبقرية بيرجمان والنقطه اللي تميز فيها بشكل عظيم وهي حواراته الفلسفيه وهي حاله استثنائيه مش هنشوفها في السينما تاني ….

4- ( عيوب )

مفيش مخرج خالي من العيوب واما عن عيب بيرجمان هو تكراره لفكرة عدمية الإله في معظم افلامه ودي اللي خلت معظم المشاهدين ياخدوا الإنطباع ده عن افلامه وكررها كتير بشكل ملحوظ حتي لو موضوع الفيلم بيناقش فكره تانيه اوقات كتير كان بيدخل حوار بيدور عن الإيمان ويذكر فيه عدمية الإله معبراً عن نفسه وده عيب كبير محبتوش اما عن التنوع فبيرجمان قدم كتير جداً بعيداً عن الموضوع ده …

جميع افلام انجمار بيرجمان بترتيب الأفضليه بالنسبه لي

1- The seventh seal (1957)
2- Fanny and Alexander (1982)
3- Wild strawberries (1957) 
4- Winter light (1963)
5- Persona (1966)
6- Sawdust and tinsel (1953)
7- Hour of the wolf (1968)
8- From the life of marionettes (1980)
9- Cries and whispers (1972)
10- Shame (1968)
11- The silence (1963)
12- In the presence of the clown (1997)
13- Scenes from a marriage (1973)
14 – The virgin spring (1960)
15- Through a glass darkly (1961)
16- Autumn sonata (1978)
17- Brink of life (1958)
18- The passion of Anaa (1969)
19- Summer with monika ( 1953)
20- Smiles of a summer night (1955)
21- Saraband (2003)
22- The magic flute ( 1975)
23- Face to face (1976)
24- The magician (1958)
25- The rite (1969)

استمتعوا بالسينما

اقرأ ايضاً لنفس الكاتب : 

Behind The Scene

بيهايند هي كيان سينمائي مصري متخصص فى مجال ترشيحات الأفلام والمسلسلات وتقديم تغطية لكافة الاخبار الفنية في السينما والدراما

ذات صلة

زر الذهاب إلى الأعلى