Skip to content

عزت صبري يكتب .. فوتوكوبي ورحلة البحث عن الونَس؟

محتوى المقالة

تتجوزيني يا ست صفية، قولتي إيه؟
– قولت اكيد اتجننت .. مينفعش انا ست أرملة .. والناس؟ .. انا عندي السكر .. وابني كبر وهيقاطعني .. مينفعش يا استاذ محمود مينفعش راجل يدخل حياتي .. انت متعرفنيش، انت شايفني من بره بس.
– انا مش بحارب الزمن ياست صفية، انا بس عايز اخد منه اي حاجة تفضل بعدي
اتفرجت على فيلم فوتوكوبي وعجبني .. لاء عجبني جدًا .. عكس ما قريت عنه من أراء سلبية. الفيلم حلو وبسيط جداً .. غاية الإنسيابية والبساطة، بداية من الحوار السلس المتأثر بروح و كلاسيكية الخمسينات وأغانيها اللي فضلت مرتبطة مع أبطاله. السيناريو السهل وموسيقى تصويرية مُريحة للسمع.. وصولاً بالتمثيل الصادق والمرعب في سلاسته من جميع الممثلين في الفيلم خاصة “محمود حميدة” اللي بركز معاه بكل حواسي لما يمثل.. حبيت حميدة بدايةً من فيلم “آسف ع الإزعاج”.. قبل كدا مكنتش منتبه له.
عزت صبري يكتب .. فوتوكوبي ورحلة البحث عن الونَس؟ 1
الفيلم عادي مفيهوش أي تصاعد فـ الاحداث .. محافظ على وتيرة وأسلوب سرد كلاسيكي وإتقدم بشكل حديث بدون أي تعقيدات أو افتكاسات .. كإنها حدوتة بتتحكي أنت عارف نهايتها ومصمم تكمل وماشي فـ الأحداث مع شخصيتها وعايز تسمعها وتشوفها برضو.. حوار بسيط ومُلهم فـ رقته وجماله .. وجارح أحياناً فـ ردود الأفعال.
أداء تمثيلي مُبهر من الجميع بدون أي استثناء أو تحفظ على أي حد ..

“محمود حميدة” بالنسبالي بيقدم وجه مختلف مش ممل في أدائه الحقيقة..
“شيرين رضا” .. المفاجأة اللي أخيراً شوفناها فـ دور غير الهانم بنت الباشا سيدة المجتمع.. قدرات تمثيلية أول مرة نشوفها.. جمال روحها على الشاشة وبساطة أحلامها.
عزت صبري يكتب .. فوتوكوبي ورحلة البحث عن الونَس؟ 2
“أحمد داش” اللي هلكنا من الضحك في اوقات كتير واللي بيقدم تاني أفضل دور مساعد.
“علي الطيب” اللي حببني فيه بعد وجوده اللي مكنش واضح في برنامج “ضحكني شكراً” وطبعاً “بيومي فؤاد” اللي نجح أنه يكرهني فيه واللي أخيرًا اتحط فـ قالب مش كوميدي.. وعوداً حميداً لفرح.
فوتوكوبي فيلم إنساني بيلمس فيك حاجة شخصية من جواك .. إيه اللي يمنع تستمتع باللي فاضل من حياتك؟ إيه يمنع تحب مهما كان سنك؟ إيه يمنع تختار اللي محتاجه معاك فـ مرحلتك..أنا كنت حزين إني مقدرتش أتفاعل في مشاهد كنت حاسس إني فاقد جزء من الإحساس أو الإنسانية..

فوتوكوبي فيلم يحسسك إن السينما دي مكان جميل اوي.

 

عزت صبري يكتب .. فوتوكوبي ورحلة البحث عن الونَس؟ 3

اترك تعليقك
Share on whatsapp
Share on facebook
Share on twitter
Share on linkedin
Share on email
اقرأ ايضاً