عزت صبري يكتب: ما وراء الطبيعة ان ترى العراب بجوارك

ما وراء الطبيعة حلو، تصوير، اخراج، كتابة، موسيقى تصويرية، تمثيل

أحمد امين – رفعت اسماعيل

– أداء أحمد أمين باين فيه التعب والاجتهاد وانقاص وزنه اللي خلاه جايب الشبه لدرجة كبيرة من شخصية د. رفعت اسماعيل الا اني مفهمتش ليه طلع بصورة نمطية كئيبة زيادة عن اللزوم كده! عن شخصية الرواية.. واللي قرأ السلسلة هيفهم كلامي.. رفعت اسماعيل على قد ما كان بيقابل رعب واحداث على قد ما كان مرح جداً وبيضحك عادي.. انا فاهم ان دي معالجة درامية ومش بالضرورة تكون نفس صفات شخصية النص الأصلي .

لكن مسلسل ما وراء الطبيعة ده فيه ذكريات جيل كامل مع روايات الجيب وشخصيتهم الأسطورية المفضلة اللي قدر يخلقها وسطنا ويحببنا فيها على مدار سنين د. أحمد خالد توفيق الله يرحمه.

– وعرفت بعد كده السبب لما شوفت الفيلم الوثائقي عن مسلسل ما وراء الطبيعة ، امين قال ان ده كان توجيه مخرج حتى طريقة رمي الافيه وأنه يضحك إزاي ده كان توجيه كامل من مخرج العمل.. ومعرفش يمكن لو آمين رمي الافيه بشخصيته في برنامج البلاتوه وضحك ضحكته المعتادة يمكن كنا اتقفلنا.. فقدر ولطف.

ما وراء القصة – ما وراء الطبيعة

مراجعة مسلسل ما وراء الطبيعة

– الترابط بين سلسلة روايات ما وراء الطبيعة والمسلسل مُتقن لحد كبير، ويشجعك تكمل. ده غير الموسيقى التصويرية العظيمة اللي بتحسسك انك دخلت بين السطور.

– شخصية ماجي اختيار موفق وقريب للصورة الذهنية اللي كانت في دماغي كـ كقارئ. هي وشخصية شيراز اللي عيشتنا سنين من الرعب.

– الشخصيات التعبيرية وفن الحوار مع قلة الكلام زاد الوضع هيبة وتناغم مع سير الأحداث.

– نظرات الممثلين مفيهاش أي تصنع او زيادة ابهار، كله في السهل الممتنع والطبيعي والمقنع.

– ولازم نشيد بأماكن التصوير.. برضو كانت اقرب ما كان في ذهني اثناء القراءة.

وحقيقي انا مبسوط وفخور اننا عملنا حاجة محترمة ومتعوب فيها بالمستوى ده .. فمهم جداً نقيّم مسلسل ما وراء الطبيعة على IMDb مش بقولك روح اديله ١٠ من ١٠ بس احنا جمهور كبير، لو ربعنا بس دخل على IMDb وعمل Rating للمسلسل وللحلقات او عمل اي Activity حتى هيفرق جامد معانا والناس كلها هتبدء تحط عنيها علينا وع القصص اللي عندنا والدراما اللي نقدر نقدمها من روايات وأعمال كتير اتكتب.

ونبتدي نعمل شغل نضيف.. لازم برا يعرفوا اننا موجودين واننا بشوية مجهود نقدر ننافس ونبقي في الصورة.. وبعيداً عن التريند الإيجابي جداً لصالح المسلسل فـ عمرو سلامة باين تعبه ومجهوده هو وفريقه واتمنى يجني ثمار تعبهم واتمني اشوف المسلسل محطوط في الـ list بتاعه Most popular tv