شرح وتفسير

دليلك لفهم فيلم inception

فيلم Inception من الافلام القليله جداً اللي مفيش اتنين اتفقوا علي نهايتها وبعيداً عن النهايه في ناس ممكن تشوف الفيلم مره واتنين عشان تستوعب احداثه … وعن نفسي لما عرفت اني هشرحه شوفته تاني عشان اقدر الملم كل احداثه واي حاجه واقعه مني اكملها ..

اول حاجه هنبسط فكرة فيلم inception وهي الوهم .. كوب (ليوناردو ) والفريق اللي معاه شغلهم انهم يسرقوا الافكار .. بتنويم الشخص المراد استخراج الفكره منه ووضعه تحت جهاز يقدروا يتحكموا وقتها بالحلم بتاعه ويحطوه في عالم اشبه بالواقع ويسرقوا الفكره من الحلم .. المره دي مهمة كوب تختلف وهي مش سرقه فكره لا المره دي هي زرع فكره ودي المهمه اللي طلبها منه سايتو مقابل انه يرده لبيته واولاده …

حاجات اساسيه لازم نفهمها قبل ما نتعمق في شرح inception ..

 

1- كل شخص بيدخل عالم الاحلام بيكون معاه تميمه .. التميمه دي هو الوحيد اللي بيكون عارف هي بتدل علي واقع او حلم ..

زي الزهر لو وقع علي رقم معين يبقي صاحبه في حلم ولو وقع ع رقم عشوائي يبقي هو في الحقيقه وتميمة كوب كانت البتاعه اللي بتلف او بمعني اصح وادق تميمة زوجته ..

2- لما شخص بيقتل نفسه في الحلم بيرجع للطبقه اللي قبلها ازاي ؟

مثال بسيط لو انا في الواقع ودخلت حلم وقتلت نفسي جواه ببساطه هرجع للواقع .. طيب لو انا في حلم ولنفترض مثلا كنت في الصحرا وبعدها دخلت حلم تاني كان في البحر ..لو انا قتلت نفسي في حلم البحر مش هرجع للواقع لا .. هرجع للطبقه اللي قبلها وهي طبقه الصحرا …

3- كل تميمه بتخص صاحبها وبس ولو شخص تاني لمسها بتفقد قيمتها… تميمة كوب هي الخاتم اللي في ايده الشمال مش البتاعه اللي بتلف .. البتاعه دي بتاعت مراته ..



4- الشخص اللي بيموت في حلم بيتوه في اللاوعي او بمعني اصح طبقه المتاهه ولو قتل نفسه هيرجع للطبقه اللي قبلها مش الواقع .. مثال — سايتو لما كبر وعجز وكوب راحله في الاخر عشان يحرره كان في قلعه علي البحر ودي كانت طبقه المتاهه واللاوعي اللي تاه فيها سايتو وعشان يرجع لازم يقتل نفسه ودي شوفناها لمامسك المسدس تلميح بأنه هيقتل نفسه

ده كان شرح عام للأحداث اللي يمكن بعض الناس بتتوه فيها نيجي بقي للنهايه ..

انا كتبت نهايتين وهما الاقرب منطقيه بالنسبالي وانتوا اختاروا الاقرب منطقيه وتكون مرضيه ليكم ..

النهايه الاولي من وجهة نظري مفتوحه ولحد دلوقتي مقدرتش اعرف ده حلم ولا واقع بس مش هقول كده وبس من غير سبب .. اول حاجه لو هنفترض ان البتاعه اللي بتلف دي هي اللي بتوضح لكوب هو في واقع او في خيال .. فهي فضلت في الاخر تلف وبدأت تبطئ لو كانت وقفت كنا هنقول انه واقع ولو فضلت تلف كنا هنقول انه حلم ولكنها فضلت متعلقه وعشان كده بقول النهايه مفتوحه ونولان سابها للمشاهد يختار النهايه المرضيه ليه ..

النهايه التانيه .. لو هنفكر بعمق شويه هنلاقي ان البتاعه اللي بتلف دي مش دليل اصلا علي الواقع او الخيال لانها بتاعت مراته مش بتاعته ونولان حطها اخر مشهد في الفيلم تشتيت مش اكتر لو هنبص للحقايق اللي قدامنا هنلاقي ان التميمه بتاعت كوب هي الخاتم بتاع جوازه .. لما كلم ولاده في التليفون كانوا مع جدتهم ومشهد النهايه مكانتش موجوده بدون سبب مقنع .. واخيراً راح لولاده بسهوله جداً في المكان والمنظر اللي كان بيتخيلهم دايما فيه بنفس الشكل بمعني ان ده اما ذكريات كوب او هو حلم وهو بيحلم انه اخيرا حقق الحلم ده وده بيوصلنا ان النهايه حلم لانها دايماً كانت النهايه اللي كوب بيتمناها ..

اتمني اكون عند حسن ظنكم واتمني يكون الشرح سهل وبسيط وعجبكم والبوست مفتوح للنقاش وطبعا مسموح بتقبل اراء الكل واحترام وجهات نظر الجميع .

بقلم : حسن سلامة

الوسوم
زر الذهاب إلى الأعلى
إغلاق
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock