من الافلام المظلومه جداً جماهيرياً ..
طاقم العمل: جيسي ايزبنبيرج – ميا واسيكوسكا – والاس شوان
طاقم العمل مش مشهور للأسف ماعدا جيسي ايزنبيرج وكان ليه ادوار جميله جداً قبل الفيلم ده … ميا دور جميل جدا بيفكرني بدور ايما ثورمان في. Pulp fiction. ومش عارف السبب الحقيقه بس فكرني بدورها او المخرج تاثر بيه .
– سيمون شاب حياته ممله الي حد كبير وانطوائي ودايماً الناس بتعامله كأنه غير موجود زيادة المشاكل النفسيه والاجتماعيه اللي بيمر بيها … مع مرور الوقت بتزيد المشاكل دي بعد ظهور شبيه طبق الاصل ليه اسمه جيمس … جيمس شخصية اجتماعيه جداً وناجحه وهو النقيض لشخصيه سيمون فياتري الصراع بينهم هيكون ازاي ؟
– الفيلم غامض جداً ممكن نقول عليه سريالي لانه بيدور في عالم غريب والبشر اشبه بالالات اللي بتنصاع لأوامر معينه او شبه حد مسيطر علي عقولهم وفي لقطات كتير بتبين سوداويه العالم ده او قربه للكابوس ..
– سيناريو الفيلم معقد.. الاحداث غريبه جداً المشاهد بيحتاج رقت عشان يفسرها ويقبلها .. الحوار ما بين الشخصيات غريب وخالي من المشاعر ولكنه في نفس الوقت رائع وشدني
-التصوير كان رائع بيوضح حياه سيمون ووحدته وانعزاله عن البشر وضعف شخصيته وايضا بيعكس سوداويه العالظ المحيط بسيمون بما فيه من غرابه وسوداويه
– موسيقي الفيلم عظيمه جداً كفيله لوحدها تشد المشاهد وتسحره .. والموسيقي للرائع اندرو هيويت ..
– اخراج الفيلم: ريتشار أيواد … وده العمل الوحيد اللي شوفته للمخرج ده ولكنه كان عمل عظيم ومتكامل
