مقالات

افلام نولان مخرج لن تفهم افلامه من مره واحده

المرة دى مش هتكلم عن ممثل أو ممثلة .. هتكلم عن مخرج متميز جدا وهو  ” كريستوفر نولان ”  .. المميز في أفلام نولان انها مش مجرد ساعتين وخلصت .. لاء خالص.

إنت هتتفرج .. وهتفضل تفكر في النهاية وتحليلها .. وتناقشها .. وبعد كده تفصص المشاهد وما وراء الكلام ..

وتستطعم فلسفسته الخاصة بينك وبين نفسك

كل فيلم له رؤية له حالة ..

فاسمحولي اقول نبذة عن أفلامه

معلش البوست طويل بس اتس نولان يعني ?

بدايتي معاه كان فيلم Inception

طبعا الفيلم ده غني عن التعريف ..

بعيدا عن قصة الفيلم وتحليل النهاية ..

فلو بعدنا عن بهرجة المؤثرات اللي هتخطفك .. فهو بيناقش نقطة مهمة جدا ..

بيناقش دواخل كل شخص فينا .. بيناقش تفاصيلنا الصغيرة أوى اللي أثرت فينا واتسجلت في الذاكرة الدائمة واتحبست جوه العقل الباطن ..

تفاصيل السعادة والألم .. نهاية الفيلم مش مهم تعرف هو في حلم ولا حقيقة ..

نهاية الفيلم إنك توصل لحقيقتك وتواجهها أى كانت هي إيه ..

الفيلم ده خلاني اعشق اى عمل لليو طبعا .. بس مخلنيش أدور ع المخرج

اللي خلاني أدور عليه وأنبهر بيه .. أول جزء من ثلاثية باتمان .. وهو Batman Begins

انبهرت إن حد فكر في ما وراء الشخصيات في دوافعها ومشاعرها .. في صراعها الداخلي!

إن حد بعد عن الأكشن والطيران وبس .. ودخل جوه الابطال نفسهم ! لدرجة إنك ممكن تلوم البطل وتتعاطف مع الشرير وتفهم دوافع المجرم!

طبعا بعد الفيلم ده مسيبتش فيلم لكريستيان بيل

بس خلاني اركز مع المخرج

بقيت بسمع كتير كلمة الفيلم ده لنولان ..

قلت أشوف مين عم نولان ده بقي !!

عشان استمتع بسيمفونية من عزف ألباتشينو وروبين ويليامز إسمها Insomnia

القصة عاديه جدا خرجها نولان بطريقة غير اعتياديه ..

لعب علي الصراع النفسي اللي حول قصه عادية جدا جريمه قتل ومحقق بيدور علي القاتل ..

بس الفيلم بيلعب علي وتر حساس جدا … اسمه الغاية تبرر الوسيلة ..

بيناقشك إنت في حوار خاص مع نفسك .. هل فيه مرة اتنازلت عن مبادئك حتى لو لمصلحة العدالة !! .. هل ضيعت طريقك ولا محافظ عليه !

فيلم فلسفي .. وفلسفته خاصة جدا وأداء الممثلين أكتر من عبقري ..

من قريب شوفتله فيلم وهو Momento ..

فلسفة بردو داخل إطار من الغموض والإثارة .. واحد فاقد الثقة في الجميع لانه بيفقد ذاكرته الحديثه بسبب حادثة اتعرضلها .. والمفترض انه بيدور علي قاتل زوجته ..

دى القصة العامة .. بس مع نولان .. لازم نسأل نفسنا ..

هو احنا فعلا مصدر ثقة لنفسنا !

طب احنا عايزين إيه . الهوى والمزاج ولا المنطق والعقل .. او يمكن عايزين العدل ..

طب إنت هتتبع أنهي طريق من دول ؟!

نفسك دى شكلها إيه عشان تقدر تقول أنا بثق في نفسي !

فيلم فلسفته من لون جديد وجميل جدا لفكره اتناقشت في كذا فيلم قبله .. بس نولان خلاها مميزة ..

طبعا فيلم The Prestige عايزله مقال عشان أقدر أتكلم عنه ..

لكن هقول نبذة مختصرة بردو . انهم اتنين سحرة .. بينافسوا بعض .. ونهاية غامضة .. وجريمة قتل ..

بس مع نولان سيبك من القصة الأصلية تماما ..

دور فيما وراء الأحداث ..

في الفيلم ده نولان بيحطك قصاد مشاعر كتير جدا ..

اولها ان الحياة بلا قيمة لو اللي بتحبه بيعاملك ببرود ومش بيحبك !

وثانيها .. إن ممكن جنون العظمة كفيل بتحويلك لمجرم عشان ترضي الايجو الخاص بيك !

أما ثالثهم .. فإن التمييز أهم شىء .. كتير بيعملوا نفس الشىء .. إنما سر القوة والاستمرارية بيكون في سر تميزك .. في لونك اللي محدش بيعرف يقلدك فيه ..

فيلم فيه أداء عبقري من كريستيان بيل وهيو جاكمان .. لدرجة انت مش هتعرف تاخد صف مين فيهم الحقيقة !!

لسه في قايمته فيلمين ماشوفتهومش .. Interstellar و Dunkirk

واللي واثقة إني هلاقي فلسفته فيهم بعيد عن القصة الأساسية .. وهسرح فيها .. واناقشها مع نفسي ..

حقيقي نولان بيرضي جوايا الباحثة عن الحقيقة .. بيخليني أسال نفسي كتير .. ليه وازاى ؟

بقلم : وسام عبد الوهاب

الوسوم

Behind The Scene

بيهايند هي كيان سينمائى مصري متخصص فى مجال السينما والدعاية السينمائية نعمل على تقديم احدث الاخبار المصرية و العالمية فى مجال السينما ودعم الافلام السينمائية
زر الذهاب إلى الأعلى
إغلاق
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock