مقالات

مراجعة فيلم A Beautiful Mind

من أهم الأفلام اللي اتبنت قصتها علي مرض نفسي شهير هو فيلم A Beautiful Mind السيرة الذاتية لعالم الرياضيات “جون ناش” المبني قصته علي مرض الفصام( السكتزوفرينيا ) المتداول بين العامة بإسمه اللاتيني (شيزوفرينيا)

علي خلاف المتداول فالشيزوفرنيا مش مرض تعدد الشخصيات زى ما السينما صدرت لينا المعلومة الخاطئة دى، انما الشيزوفرينيا هو مرض الاضطراب النفسي ويشمل هلوسة سمعية وبصرية .

اقرأ ايضاً : اعرف نوع الفوبيا الخاص بك من خلال الأفلام

A Beautiful Mind فيلم

معلومات قبل مراجعة فيلم A Beautiful Mind

من ضمن أنواع الفصام او يعتبر من ضمن اعراضه الجانبية عرض اسمه .. جنون الارتياب المعروف باسمه اللاتيني ( لبارانويا)، وده الاساس اللي اتبنت عليه قصة ” جون ناش “مريض الفصام وجنون الارتياب والمؤامرة ..

نبدأ بـ نبذه طبية بسيطة عشان نفهم حاجات كتيره عن المرض وعن الشخصية .. وندمجهم بالفيلم .. ونشوف هل الفيلم قدم الحقيقة ولا قدم الخيال

  • اولا .. مريض الفصام ما بيعرفش انه مريض .. يعني مش بيحس ابدا بأى غرابة في تصرفاته .. المحيطين بيه بس هم اللي بيكتشفوا ده .. زى ما حصل في الفيلم وزوجته ” أليشا ” لاحظت انه بقي مريب ويخوف في تصرفاته
  • ثانيا .. مرض الفصام أينعم اضطراب نفسي بس ناتج عن مرض عقلي سواء وراثي أو جيني أو بيئي، فالفصام كمرض ليه كذا نظرية في نشأته بتختلف بإختلاف التشخيص . بس اللي يهمنا هنا إن المريض لازم ياخد علاج تحت اشراف الطبيب في مده هتزيد عن 6 أسابيع كجرعة علاج مبدئية .. وده اللي فعلا تم في الفيلم وتمت محاكاته بدقة مع الواقع الطبي
  • ثالثا .. نقطة بتظهر الحقائق في الفيلم بتزود من مصداقيته وهو النطق بإسم عقار (الثورازين) الإسم التجارى للمادة الفعالة ( كلوروبرومازين ) اللي أول اطلاق ليها كان في الخمسينات .

 

a-beautiful-mind-4

العلاج فارماكولجيا بيلجم مستقبلات الدوبامين فبيقلل من مساحة التهيؤات السمعية والبصرية للمريض، وده ظهر في إن الزميل الوهمي ” تشارلز ” كان ظاهر قصاد ” ناش ” وهو تحت تأثير العلاج بس ما بيتكلمش .

نقطة إبداع تضاف للقائمين علي الفيلم وهو ادراج اسم ” الصدمة بالانسولين ” ضمن سياسة العلاج للفصام .. لانه كان شائع جدا في الخمسينات ادخال المريض في غيبوبة مصطنعة تحت الاشراف طبعا لمدة من خمس لست أيام في الاسبوع و لمدة ست اسابيع زى ما اتقال في الفيلم بالظبط .

طبعا العلاج بجلسات الكهرباء شائع ومعروف فمش هيضيف للفيلم انما الابداع في دمج الفيلم بالواقع كان في ذكر الثورازين وصدمة الانسولين ..

  • رابعا .. هل ” راسل كرو ” قدر يجسد دور مريض فصام ؟

بالفعل مثله واجاده وتفوق علي نفسه فيه .

مريض الفصام عنده ارتباك عام في الحركة .. بؤبؤ عينه ما بيثبتش بسهولة .. تفكيرة اسرع من ردود افعاله ( فممكن تلاقيه بيتهته مش ماشي متزن ) منعزل كاره جدا للاجتماعيات .. وده ظهر جدا في شبابه

فيلم-A-Beautiful-mind

تاثير العلاج بيسبب رعشه ورجفه في الشفايف .. تأخر في ردود الفعل .. توهان .. عدم الرغبة في اي شىء وده تمثل في اكتر من مشهد سواء في مشيه ” ناش ” وكلامه او في تعامله مع مراته ..

اما بالنسبة لتوقف تناول العلاج .. فهيقلل الاعراض الجانبية دى لكن مش هيمحيها خصوصا لو التوقف جه مفاجئ مش تدريجي ..

  • خامسا .. مريض الفصام لو هيتعالج لازم رغبة داخلية واقتناع نفسي بالاضافة للادوية ..

باختصار المريض مخلقش الشخصيات دى الا لانه بيملي بيها فراغ

وفي الفيلم ” ناش ” مخلقش صاحبه الا لانه منعزل تماما اجتماعيا

مخلقش جو المؤامرة الا لانه فاقد الشغف تماما في شغلة اللي بيمثله جحيم ( كون واحد مبدأه إن المحاضرات تضييع وقت ينتهي بيه المطاف لمدرس محاضرات فده جحيم تام )

عشان كده كان لازم صدمه ادراك، صدمة الادراك هي الشىء الوحيد اللي ممكن يحقق نتيجه العلاج الكاملة لان وقتها المريض مشارك في العلاج

جات اول صدمة من زوجته في بداية العلاج لما اثبتتله ان كله وهم .. بس مكنتش الصدمة دى كفايه، فجت صدمة انه هيتسبب في موت ابنه وهنا بس قدر يفكر .

الخيال الصحي كلنا بنتولد بيه بنسب متفواته ، وبنتخيل شخصيات وهمية بنكلمها وبتسلينا ، وبينتهي ده مع سن ال 7 سنين وهو سن الادراك .. لان الخيال وقتها بيتراجع ويخمد في اللاوعي .. انما في مريض الفصام الخط الفاصل بين الوعي واالاوعي معدوم، عشان كده لازم صدمة الادراك

  • سادسا .. هل الفيلم بيروج لفكره ان مريض الفصام ممكن يخف لوحده بدون تدخل علاجي ؟! ..

بصراحه صناع فيلم A Beautiful Mind فعلا لقوا انهم روجوا للفكره دى بقصد او بغير قصد فزودوا سطر بسيط في اخر الفيلم ما يضرش بالاحداث( خصوصا انهم بعدوا تماما عن قصه ناش الحقيقة وتقدروا ترجعوا لويكبيديا عن سيرة العالم الحقيقي ) وهو انه اخد أنواع ادوية حديثة للعلاج اينعم ما منعتش رؤية الهلاوس تماما بس ساعدته في تجاهلها .

المركز اوى مع الفيلم هيحس ان السطر ده دخيل .. وانه بيخالف السيناريو اللي ماشيين عليه

بس الحقيقة ان لو مكنش الفيلم اتضاف الجزء ده فيه كان هيبقي خيالي ومروج لفكرة خاطئة وممكن تكون مضرة او مميتة لو اتصدقت

مرض الفصام من غير علاج غير مضمون شفاؤه التام لان المرض مضاعافته وتشعباته كتيره جدا ولازم حصارها بالادوية والمتابعة والا هتتفاقم ..

فيلم A Beautiful Mind ما استحقش الاوسكار من فراغ

القصة فيها جهد ومحاكاه وتعب حقيقي حتي لو عن سيرة ذاتية

التمثيل في اروع درجات التقمص فيه من كل الاطراف ..

اللقطات التي لا تُنسي ..

* لقطة ما ” ناش ” بيهدى ” اليشا ” هديه عبارة عن كريستالة وهو طبعا جاى متأخر وهي مستحلفاله والهدية سخيفة . بس بنتفاجىء بحاجه احنا كنون النسوة بنعشقها .. بنلاقيه بيقولها “عشان تشوفي جواها كل الالوان انت لما كنتي واقفه قصاد اللوحة عجبتك عشان الوانها الكتير انا سمعتك يوم الحفلة قولتي كده “

* تفسير ما وراء الافعال .. و حسن الاستماع .. هو كلمه السر لمفتاح اى مرأة في العالم .. بالفعل بنلاقي ضحكتها نورت واحنا بنعيش معاهم لقطة رومانسية غريبة من عالم ما بيفهمش الا الارقام

* تانى لقطة .. لما ” اليشا ” بترفض تتخلي عن زوجها وبتقوله اروع نصيحه ” لعل الفاصل بين الحقيقة والخيال مش في العقل في القلب “

وعليه بيقدر بارادته انه يقاوم هلاوسه بسبب طاقة الحب اللي استمدها منها

* اما اروع مشهد وهو الختامى .. اما بينسب ” ناش ” لزوجته كل الفضل .. ويقولها ” انا موجود هنا بسببك .. بسببك انت بس .. انت كل اسبابي ” ….

فيلم A Beautiful Mind تصنيفة سيرة ذاتية / دراما بس بعد جملة

you are my all reasons

انا بصنفة رومانسي من الدرجة الاولي ..

فيلم لازم تضيفة لقايمة مشاهداتك لو مشوفتوش ..

بقلم : وسام عبد الوهاب

الوسوم

Behind The Scene

بيهايند هي كيان سينمائى مصري متخصص فى مجال السينما والدعاية السينمائية نعمل على تقديم احدث الاخبار المصرية و العالمية فى مجال السينما ودعم الافلام السينمائية
زر الذهاب إلى الأعلى
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock