مقالات

اكثر 8 افلام جعلت من كريستوفر نولان مخرج مشهور

لازم نعرف ان نوعيه افلام كريستوفر نولان مش السرياليه زي مافي ناس مقتنعه لأن في فرق كبير جداً بين السرياليه والغموض … افلام نولان بتمتاز بالغموض والتشويق مع الدراما وبعض الاكشن وقليل من الكوميديا ودايماً افلامه بتعلق مع الناس ولحد دلوقت ده يمكن المخرج الوحيد اللي مشوفتلوش فيلم واحد وحش وبستمتع بكل افلامه وافضل ما يميز افلام نولان هي الموسيقي التصويريه بتاعتها وده طبعا يرجع لصاحب الفضل الموسيقار العظيم هانز زيمر اللي دايما يمتعنا بموسيقاه ..

خلونا نتكلم عنه وعن اعماله ..

اشهر واقوى افلام كريستوفر نولان

1- Memento 

Memento 

الفيلم الاول من نحية الاخراج لـ كريستوفر نولان .. فيلم جميل جداً فريد من نوعه محتاج مخرج متميز عشان العمل يطلع بالشكل ده وطبعاً نولان اثبت نفسه كمخرج من افضل مخرجين العصر الحالي بالفيلم ده .. حبكه سيناريو اخراج كل حاجه عملها نولان بطرية مثاليه مش مجرد لغبطه وخلاص كل تفصيله مهمه وبالتدريج بتتكون الفكره عن طريق جمع الاحداث بالعكس لتظهر لنا النهايه بكل سلسلاسه وسهوله وبدون تعقيد تخيل انت كمشاهد وجدت صعوبه في مشاهده الفيلم وكنت محتاج تركيز عالي جداً ما بالك بقي بصانع الفيلم ؟ …

2- The dark knight

اعظم فيلم لنولان ومن اكتر افلام كريستوفر نولان اللي ممكن تستمتع بيها .. فيلم عظيم جداً فيلم متكامل من كل النواحي .. اخراج .. قصه .. اداء .. حبكه .. سيناريو .. حوار .. موسيقي تصويريه .. جميع العناصر اللي تؤدي لنجاح فيلم وتسميته بعظيم موجوده يكفي وجود شخصيه مجنونه بابعاد نفسيه زي الجوكر شخصيه زي دي لا يكفيها وجود ممثل شاطر وبس لكن وجود مخرج زي نولان ادي طعم للشخصيه وخلاها تخرج بالعظمه اللي شوفناها دي وفيلم اجمع عليه النقاد والجمهور ولازم نديله حجمه بس للاسف بعض الناس بتبالغ في عظمته وده اللي خلي بعض الناس تنفر من الفيلم وجمهوره وشخصيه الجوكر ونولان نفسه …

3- Interstellar

افلام الفضاء مش كتير بالقدر الكافي ولكن لما نتكلم عن افلام الفضاء لابد من ذكر الفيلم ده .. من الافلام المفضله بالنسبالي ومش بسبب الفضاء والسفر عبر الثقوب الدوديه والزمن والجاذبيه .. الفيلم حسيت ان ليه طابع درامي غلب الجانب العلمي .. من اكتر الافلام اللي اثرت فيا واعجبت بيها ومش هنسي الموسيقي التصويريه بتاعت هانز زيمر اللي ادت للفيلم معني تاني ومن افضل الساوند تراكس اللي سمعتها في حياتي بتاعت الفيلم ده .. وبرضه من الافلام المكتمله بالنسبالي مثلها كمثل فارس الظلام بس طبعاً متحققش فيها عامل زي المتعه والتشويق .. خلونا نتفق علي عظمه الفيلم ده ومنقللش منه لانه حتي لو كان اقل من افلام الفضاء المتميزه فهو فيلم عظيم لازم نديله حقه وبالنسبالي هو المفضل بالنسبالي من بين افلام كريستوفر نولان … ومينفعش ننسي ان فيلم عظيم زي ده المخرج بتاعه هو كريستوفر نولان …

4- Inception

مين فينا هينسي تعقيد الفيلم ده ؟ ليوناردو وكوتيارد .. طاقم العمل اللي صعب يتكرر في فيلم … كادرات جميله جداً ترتقي الي حد العظمه .. مبدئياً ده الفيلم الاول بالنسبه للكادرات من بين جميع افلام نولان مش هنسي الكادر اللي الاوضه اتقلبت بجوزيف جوردون ولا الكادرات اللي ظهرت في ذكريات البطل ولا كادرات البدايه والنهايه .. سيناريو معقد وللعلم تمت كتابته في 10 سنين من طرف نولان واخوه ويستاهل فعلا الوقت ده … فيلم رائع جداً يتشاف مره واتنين وميتملش منه وبرضه اتحقق فيه كمال كل عناصر الفيلم واللي خلاه يخرج بجوده كويسه جداً تشد اي مشاهد للسينما ويعلق معاه ويخلق جدل كبير بين المشاهدين سواء في احداث الفيلم او نهايته .. فلازم نشيد بنجاح الفيلم ده للمخرج لأن مش اي مخرج او كاتب سيناريو يقدر يطلع عمل بالشكل المبهر ده ..

اقرأ ايضاً : دليلك الشامل لفهم فيلم INCEPTION

5- The dark knight rises

بعيداً بقي عن جزء فارس الظلام والجوكر الجزء ده عظيم جداً جداً جداً ومش واخد حقه اطلاقاً اوقات بشوفه افضل من جزء الجوكر ويستاهل الكلام عنه بس للأسف مش واخد حقه بين الناس .. شخصيه زي بين وابعاد الشخصه النفسيه وماضي الشخصيه ومعاناتها يمكن من احسن الحاجات اللي شوفتها في حياتي في استرجاع ماضي ومعاناه شخصيه في فيلم وقدرة الماضي ده علي رسم شخصيه زي بين ومدي تاثيره عليه … كريستيان بيل اظهر قدرات تمثيليه عظيمه مش مجرد ظهوره كباتمان وخلاص لا .. ادي دور بروس وين بكل احترافيه خلانا نعيش معاناته والجانب المظلم اللي بيعيشه بروس وين سواء في الكوميكس او في اي فيلم لباتمان … ملحمه دراميه بكل ما تحمله الكلمه من معني .. معاني كتير جميله في الفيلم ومعاني اخري سوداويه .. فيلم من العيار التقيل وكان الفيلم الختامي لثلاثيه نولان اللي حتي الان بالنسبالي افضل افلام لبطل خارق ممكن تتعمل بالجوده والجمال ده لانها مقتصرتش علي فكره وجود جانب الخير والشر لا الموضوع كان اعمق من كده بكتير …

6- The prestige

من الملاحم الدراميه الجميله جداً … من افلام الصراعات الممتعه بالنسبه للجمهور وجرعة اثاره كبيرة اوي مع اضافة طابع الغموض الطفيف مع حوارات مبهره جداً واداء تمثيلي ولا اروع من كريستيان بيل وهيو جاكمان خرج لينا فيلم رائع الي حد كبير جداً ميرتقيش لدرجة عظيم بس مينفعش نقلل من روعة فيلم زي ده وكالعاده سيناريو فيلم زي ده مكانش بالسهوله المتوقعه ولكن الفضل يرجع لنولان لأنه اخرج لينا تحفه فنيه دسمه خفيفه بالشكل ده ..

اقرأ ايضاً : دليلك لفهم فيلم The prestige

7- Insomnia

تخيل فيلم فيه الباتشينو وروبن ويليامز ياتري هيوصل لأي درجه من العظمه ؟ ..

-للأسف وعلي عكس ما كنت متوقع الفيلم كان دون المستوي ومعجبنيش بالقدر الكافي .. حوارات خفيفه صراعات اخف سيناريو طبيعي اداء تمثيلي في المتوسط من ويليامز والبا مشدنيش اي حاجه في الفيلم ومش شايفله ميزه الحقيقه وشايف الفيلم ده نقطه ضعف عند نولان ان يبقي عندك اتنين ممثلين عظماء ومتستغلهمش بالقدر الكافي او تستخرج قدراتهم التمثيليه الاستثنائيه …

8- Batman begain

اقل افلام كريستوفر نولان مستوي بس المبرر موجود وهو التمهيد لخروج باتمان من الظلام وبدايته .. فيلم مش وحش وبرضه مش عظيم كان متوسط وهو اقل مستوي في الثلاثيه وف جميع افلام نولان ولكنه فيلم مسلي الي حد ما كان فيه بعض الحوارات الجميله برضه وبيظهر كيفية ظهور باتمان البطل الخارق وتكوين شخصيته ومعجبنيش بصراحه لانه بالنسبالي مبناش الشخصيه بالشكل الكافي او مكانش فيه مقدمه ومولد باتمان زي اللي في الكوميكس بس فيلم كويس وطبعاً لازم يتشاف …

– انتهي المقال وهو كان عباره عن نبذه سريعه عن افلام كريستوفر نولان وطبعاً متكلمتش عن الافلام بالتفصيل بس حبيت اعرضها واعرض مميزاتها ولازم نعترف ان كريستوفر نولان من افضل مخرجين العصر الحالي ودي حقيقه غير قابله للنقاش حتي واعماله هي اللي بتثبت كده …

بقلم : حسن سلامة

الوسوم

Behind The Scene

بيهايند هي كيان سينمائى مصري متخصص فى مجال السينما والدعاية السينمائية نعمل على تقديم احدث الاخبار المصرية و العالمية فى مجال السينما ودعم الافلام السينمائية
زر الذهاب إلى الأعلى
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock